Физика-математика факультети
Физика-математика факультети

Кафедралар

Әмелий математика
Функционал анализ, алгебра ҳәм геометрия
Математикалық анализ ҳәм дифференциаллык теңлемелер
Электро энергетика
Улыўма физика
Ярым өткизгишлер физикасы


Әҳмийетли

www.gov.uz
O'zbekiston Respublikasi Hukumat portali
www.press-service.uz
O'zbekiston Respublikasi Prezidenti matbuot xizmati
www.uza.uz
O'zbekiston milliy axborot agentligi
www.edu.uz
Oliy va o'rta maxsus ta'lim vazirligi
www.ziyonet.uz
O'zbekiston Respublikasi Axborot ta'lim tarmog'i

 

Әмелий математика кафедрасы

Университеттиӊ ашылыўы менен оныӊ оқыў жобаларыныӊ талапларына сәйкес көплеген илим тараўлары бойынша жаӊа атамадағы пәнлерди оқытыў зәрүрлиги пайда болды. Бул өз гезегинде көп санлы жаӊа кафедраларды шөлкемлестириўди талап етти. Усы жағдайларға байланыслы 1976-жылы университеттиӊ математика факультети қурамында жаӊа «Есаплаў математикасы» кафедрасы шөлкемлестирилди. 

Кафедра шөлкемлестирилген 1976-1977 оқыў жылында кафедрада барлығы болып 6 проффессор-оқытыўшылар жумыс иследи: физика-математика илимлериниӊ кандидаты, доцент (соӊынан профессор) А.О.Отаров кафедра баслығы, экономика илимлериниӊ кандидаты А.Матекеев (соӊынан экономика илимлериниӊ докторы), Н.Примбетов, С.Пирназаров (физика-математика илимлериниӊ кандидатлары, доцентлер), Қ.Бекназарова (оқытыўшы).


Кафедраны 1976–1987 жыллары ҳәм 1991–2000 жыллары А.О.Отаров, 1987–1991 жыллары доцент С.Пирназаров, 2001–2005 жыллары доцент Н.Утеўлиев, 2005–2007 жыллары физика-математика илимлериниӊ кандидаты А.Турениязова, 2007–2009-жыллары доцент Ж.Алланазаров, 2009–2014 жыллары техника илимлериниӊ кандидаты Ш.Ешмуратов басқарған болса, ал 2015-жылдан баслап доцент М.Бердимуратов басқарып киятыр.

Университет Илимий кеӊесиниӊ шешими менен «Есаплаў математикасы» кафедрасы 1998-жылы «Әмелий математика ҳәм информатика» атамасы менен, ал 2015-жылы «Әмелий математика» атамасы менен қайта шөлкемлестирилди.

Кафедраныӊ дәслепки шөлкемлестириў дәўиринен баслап ақ оныӊ қурамын илимий дәрежели маман оқытыўшылар менен толықтырыў жумысларына айрықша дыққат аўдарылды. Әсиресе, Киев университетиниӊ есаплаў математикасы, экономикалық кибернетика ҳәм математикалық физика кафедралары менен тығыз байланыслар орнатылып, илимий-изертлеў жумысларын орынлаўға уқыбы бар көплеген жаслар дәслеп еки жыллық илимий стажировка өтиўге жиберилип, соӊынан олар аспирантурада оқып, кандидатлық диссертацияларын жақлады. Илимий дәрежели кадрлар таярлаў мәселесине ғәрезсизлик жылларында айрықша итибар берилди. Соныӊ нәтийжесинде кафедра оқытыўшыларынан Н.Утеулиев, А.Ембергенов, Ш.Бурханов, Т.Садыков, Д.Мендалиев, Ж.Алланазаров, Т.Жамуратов, Н.Примбетов, С.Пирназаров, А.Хожаметов, Д.Утебаев, М.Бердимуратов, Р.Мустафаева, Ш.Ешмуратов, Б.Айтмуратов, А.Бекиев ҳәм тағы басқа оқытыўшылар илим кандидатлары болды. Олардыӊ арасынан Н.Утеулиев 1992-жылы Киев университетиниӊ докторантурасына оқыўға кирип, 1995-жылы докторлық диссертациясын табыслы қорғап, Қарақалпақстанда математика илими бойынша биринши илим докторы болды, ал Д.Утебаев ҳәм А.Хожаметов докторлық диссертация жумысларын жазып, жақлаўға таярлық жумысларын жүргизип атыр. Кафедра ағзалары А.Пиримбетов ҳәм Г.Джайков Новосибирск мәмлекетлик техника университетинде аспирантурада оқып тамамлады, кандидатлық диссертация жумысларын жазып болып, оларды жақлаў мәселелери менен шуғылланып атыр.

Ҳәзирги ўақытта кафедра университеттиң ең жетекши кафедраларының бири болып есапланады. Кафедрада 28 профессор-оқытыўшы жумыс ислейди, олардың арасында 1 профессор, 8 илим кандидатлары ҳәм доцентлер, 19 ассистент-оқытыўшы бар болып, қосып ислеў тийкарында 5 оқытыўшы сырттан шақыртылған.
Кафедрада 2000-жылдан баслап «Әмелий математика ҳәм информациялық технологиялар» қәнигелиги бойынша магистратура ашылған. Бүгинги күнде кафедра бакалавр тәлим бағдары бойынша 23, магистратура бағдары бойынша 10, жәми 33 атамадағы пәнлерди оқытады. Кафедраның оқыў жүклемесиниң улыўма көлеми 25500 саатты қурайды.

Кафедраның профессор-оқытыўшылары жаңа педагогикалық технологияларды есапқа алып, ҳәр жылы лекция текстлерин, әмелий ҳәм лабораториялық жумыслардың материалларын қайта қарап шығып, жаңалап барады. Кафедраның барлық пәнлери бойынша электрон лекция текстлери дүзилип, университеттиң мәлимлеме-ресурс орайына тапсырылған. Заманагөй педа-гогикалық технологиялар тийкарында сабақлар электрон доскалардан ҳәм презентациялардан пайдаланылып өтиледи.

Профессор-оқытыўшылар зийрек студентлер менен бирге турақлы түрде илимий-изертлеў жумысларын орынлайды. Бундай студентлер ҳәр жылы халық аралық ҳәм республикалық олимпиадаларға қатнасып, жақсы нәтийжелерге ерисип киятыр. Атап айтқанда А.Абдиев, С.Қарабеков, Р.Оңғарбаев, Ж.Мухиятдинов, М.Нарбаев ҳәм 2-курс магистри Р.Есимбетов «Программастырыў - 2015» халық аралық олимпиадасына қатнасып, жоқары орынларды ийелеп қайтты.

Кафедра профессор-оқытыўшылары халық аралық ҳәм республикалық илимий-теориялық конференцияларға баянатлар менен белсене қатнасады. Мәселен, 2015-жылы 21-апрельде Ташкент информациялық технологиялар университетиниң Нөкис филиалында «Илим, билим ҳәм өндирис интеграциясында информациялық коммуникация технологияларын қолланыўдың ҳәзирги заман мәселелери» атамасында өткерилген республикалық илимий-теориялық конференцияға кафедраның көплеген оқытыўшылары илимий баянатлары менен қатнасты, ал профессор А.О.Отаров, доцентлер М.Бердимуратов ҳәм Ш.Ешмуратовлардың ҳәр бири бул конференцияның бир секциясына басшылық етти.

Заман талабына сәйкес жетик қәнигелерди тәрбиялаўда студентлердиң ана тилинде жазылған оқыў әдебиятларының үлкен әҳмийетке ийе екенлигин есапқа алып, кафедраның тәжирийбели ҳәм жетекши профессор оқытыўшылары көп санлы сабақлықларды, оқыўлық қолланбаларды, илимий-методикалық әдебиятларды жаратты. Профессор А.О.Отаров ҳәм доцент Ж.П.Алланазаров авторлығында жазылған, университет, педагогикалық ҳәм техникалық институтлардың студентлерине арналған «Есаплаў усыллары» сабақлығы (1-бөлими) 2002-жылы, А.О.Отаров, Ж.П.Алланазаров ҳәм А.А.Отаров тәрепинен жазылған, жоқары оқыў орынларының студентлерине арналған «Әмелий информатиканың тийкарлары» оқыў қолланбасы 2006-жылы, А.О.Отаров, ҳәм Ж.П.Алланазаров авторлығында жазылған, жоқары оқыў орынларының студентлерине арналған «Есаплаў усыллары» сабақлығы (2-бөлими) 2009-жылы Өзбекистан Республикасы Жоқары ҳәм орта арнаўлы билим министрлиги, Халық билимлендириў министрлиги, «Истеъдод» жамғармасы тәрепинен шөлкемлестирилген «Жылдың ең жақсы сабақлығының ҳәм оқыў әдебиятының авторы» атамасындағы Өзбекистан Республикалық таңлаўында жеңимпаз болды, китаплардың авторларына арнаўлы дипломлар тапсырылып, оларға баҳалы сыйлықлар берилди.

Ғәрезсизлик жылларында тәлим-тәрбия жумысларының сапасын жақсылаў, студентлерди ҳәзирги заман талапларына сәйкес тәрбиялаў жумыслары жақсы жолға қойылған. Президентимиздиң шығып сөйлеген сөзлерин ҳәм баянатларын, пәрманларын ҳәм қарарларын, жаңадан шыққан нызамларды студентлер арасында кең үгит-нәсиятлаў жумыслары алдын-ала дүзилген жобалар бойынша турақлы түрде өткерилип атыр. Студентлерде туўылған жерине, Ўатан сүйиўшилик сезимлерине ҳәм жоқары инсаныйлық пазыйлетлерди оятыў ҳәм тәрбиялаў бойынша кең көлемли жумыслар алып барылмақта.

Кафедра тәлим-тәрбия жумысларының сапасын барған сайын арттырыў, илимий-изертлеў жумысларының нәтийжелилигин жоқары маманлықтағы педагогикалық кадрларды системалы тәрбиялаўды иске асырыў мақсетинде елимиздиң ҳәм сырт еллердиң белгили жоқары оқыў орынлары, илимий-изертлеў академиялық институтлары менен тығыз байланысқа ийе. Өзбекистан Миллий университетиниң, Ташкент информациялық технологиялар университетиниң, Украина миллий университетиниң, Новосибирск мәмлекетлик техника университетиниң сәйкес кафедра-лары менен шәртнамалар дүзип, тығыз қарым-қатнаслар жасалмақта.

Кафедрада ислеп атырған илимий дәрежели
профессор-оқытыўшылар

Бердимуратов Мурат Карлыбаевич, физика-математика илимлериниң кандитаты, доцент. 1963-жылы 10-февральда Нөкис қаласында туўылған. 1989-жылы Нөкис мәмлекетлик университетин тамамлаған. 1992-1997 жыллар аралығында Киев мәмлекетлик университетинде илимий-изертлеў жумысларын алып барды. 1997-жылы «Моделирование и оптимизация в системах солевлагопереноса» темасында кандидатлық диссертация жақлады. 1998-2009 жылларда Информациялық технология кафедрасы баслығы, сондай-ақ, математика факультети деканы лаўазымларында жемисли мийнет етти. 2009-2012 жыллар арасында Нөкис мәмлекетлик педагогикалық институтының ректоры, 2014-жылдан баслап Әмелий математика кафедра баслығы лаўазымында ислеп киятыр. 30 дан аслам илимий методикалық мийнетлери баспада жәрияланды. 1 оқыў қолланба, 6 оқыў-методикалық қолланбасы баспадан шыққан.

 

Отаров Аманбай, физика-математика илимлериниң кандидаты, профессор 1939-жылы 10-майда Қоңырат районында туўылған. Ол 1963-жылы Қарақалпақ мәмлекетлик педагогикалық институтын тамамлады. 1966-1974 жыллары Киев университетиниң кибернетика факультетиниң «Есаплаў математикасы» кафедрасында аспирантурада оқыды. 1974-жылы Киев университети-ниң кибернетика факультетиниң қәнигелестирилген илимий кеңесиниң мәжилисинде «О проекционно-дифференциальном методе решения уравнений и его применение к задачам изгиба пластин переменный жесткости» деген темада кандидатлық диссертациясын табыслы жақлады. А.Отаровқа 1983-жылы доцент, ал 1992-жылы «Есаплаў математикасы» кафедрасы бойынша профессоры илимий атақлары, ал 1993-жылы Қарақалпақстан Республикасына мийнети синген илим ғайраткери ҳүрметли атағы берилди. Сол 1989-1997 жыллары университеттиң илимий ислери бойынша проректоры, экономика ҳәм математика факультетлериниң деканы лаўазымларында табыслы жумыс иследи. 150 ден аслам илимий мийнетлери, 2 сабақлығы, 1 оқыў қолланбасы баспадан шықты. 2000-жылдан баслап кафедрада профессор лаўазымында ислеп атыр.

 

Мустафаева Рахима, физика-математика илим-лериниң кандитаты, доцент. 1956-жыл 18-декабрьде Әмиўдәрья районында туўылған. 1981-жылы Нөкис мәмлекетлик университетин тамамлаған. 1995-жылы Киев миллий университетинде аспирантураны оқып, 1996-жылы «Исследование интервальной устойчивости динамических систем и моделирование процессов водообмена» темасында кандидатлық диссертация жақлады. 25 тен аслам илимий мийнетлери жәрияланды. 2 оқыў қолланбасы баспадан шыққан. 2005-жылдан баслап доцент лаўазымында ислеп келмекте.

 

Бекиев Аширмэт Бекиевич, физика-математика илимлериниң кандидаты. 1976-жыл 9-январьда Төрткүл районында туўылған. 1996-жылы Түркмен мәмлекетлик университетин тамамлаған. 2010-жылы «Краевые задачи для уравнения смешанного типа четвертого порядка, содержащего произведения операторов Лапласа, теплопроводности и Даламбера» темасында кандидатлық диссертациясын жақлады. 20 дан аслам илимий методикалық мийнетлери баспада жәрияланды. 2 оқыў-методикалық қолланбасы баспадан шықты. 2011-жылдан баслап кафедра доценти лаўазымында ислеп келмекте.

 

Ешмуратов Шавкат Артықбаевич, техника илим-лериниң кандидаты 1977-жылы 30-июльда Қоңырат районында туўылған. 2002-жылы Қарақалпақ мәм-лекетлик университетин «Әмелий математика ҳәм информациялық технологиялар» қәнигелиги бойынша тамамлаған. 2004-2008 жыллары Өзбекистан Миллий университетиниң «Программаластырыў ҳәм тармақ технологиялары» кафедрасында аспирантурада оқыды ҳәм 2008-жылы «Прозрачность принятия решения при синтезе искусственных нейронных сетей с минимальной конфигурации» темасында кандидатлық диссертациясын жақлады. 20 дан аслам илимий методикалық мийнетлери баспада жәрияланды. 2009-2014 жылларда «Әмелий математика ҳәм информатика» кафедрасының баслығы лаўазымында жумыс алып барды. 2014-жылдан баслап усы кафедраның доценти лаўазымында ислеп келмекте.

Сондай-ақ, кафедрада үлкен оқытыўшылар Р.Джумамуратов, Б.Самандаров, ассистент-оқытыўшылар Г.Утепбергенова, М.Таңирбергенов, Қ.Ибрагимов, А.Қудайбергенов, Т.Таджиев, С.Мырзатаев, Р.Утемуратов, Р.Шыхыев, М.Казымбетова, Ж.Арзиева, Р.Балтабаева, Ш.Тажибаев, А.Пиримбетов, Қ.Худайбергенов, Э.Уразымбетова, Г.Бекназарова, Г.Көмекова, Т. Жорабеков ислеп атыр.

   
Фотогалерея